اخبار مخيم البداوي

كلام ابناء مخيم البداوي من صفحات الفيسبوك

من صفحات الفيسبوك ربيع درويش والقائد ابو عماد الوني

هذا الكلام موجه لكل شاب يَئِس من المعيشة وبدأ يخطأ من غير علم بمخيم البداوي و هو من ابناء مخيم البداوي

انت مش مخرب و فشر يلي بقول عنك مخرب ، انت شاب خلقت بالمخيم و ربيت بالمخيم و اكلت و شربت من خير المخيم و بدك تتزوج بنت المخيم و اولادك حيكونوا اولاد المخيم ….

انت مش مخرب انت انسان و كل انسان عنده مشاكل بحياته ، يمكن الفقر يمكن البطاله يمكن الاهل يمكن مشاكلك الخاصة هي يلي عم تعمل منك انسان متهور

انت يلي بس عم تقوص في امرأة عم تقول الله لا يسامحو خوفني ، و نفس الامرأة بتشوفها الصبح بتقلها صباح الخير خالتي بترد عليك ب الله يرضى عليك ، نفس المرأة يلي عم بتخاف من صوت رصاصك بس تشوفك عم تدعيلك بالرضى

كلنا عم نسمع عن القوة الضاربة يلي بدها تنزل عالارض من شان المخربين

مين يلي بدو ينزل عالارض ؟؟

مش عسكر المخيم ؟؟

مش اخوي و اخوك و صهري و خالك و عمك !!

ليه لينزلوا عليك ؟؟

انت ابن المخيم انت لازم تكون عسكري معهم و حتى قائد عليهم ، لانك انت الاصل …

انا و ياك يلي خفنا عالمخيم بس تحاصر بالعيد الكبير

انا وياك يلي تلبكنا و حترنا كيف بدنا نخلص من هالحصار

امي و امك يلي مرقوا عالحاجز و احنا خايفين حدى يغلط معهم

انا و ياك بنتقاسم الدمار و بنتقاسم العمار

انا و ياك لازم نكون ايد وحدة ليبقى المخيم

شفت شعب البارد ؟؟ شفت شعب سوريا ؟؟

تعتروا تهجروا ادمرت بيوتهم و وراحت املاكهم و تركوا ذكرياتهم الحلوة مع الدمار

ليه ليصير فينا زيهم ؟؟

ليه لندمر بعدين نقول اخ ؟؟

اصحى يا اخوي اصحى يا صاحبي اصحى يا ابو قلب كبير و طيب و اول شي ارجع لربك و تاني شي ارجع لنفسك و قول انا وين رايح بحالي وين رايح باهلي وين رايح بشعبي !!؟

انا و كل اهل مخيم البداوي بنحبك و بنحب المخيم بدنا منك تحمينا و ما تخوفنا

لكل الفصائل انتوا قادرين و فيكوا بدل ما تنزلوا قوة ضاربة تنزلوا قوة اصلاح و تقعدوا مع هالشباب يلي هم اولادكم و توصلوا لحلول ترضي المخيم و يبقى اجمل مخيم و اجمل شعب

#ابِـن_الـمُـخٓـيّـم

مقالات ذات صلة