منتدى عبد خطار
منتدى عبد خطار

العودة   منتدى عبد خطار > منتدى فلسطين الحبيبة > التراث الفلسطيني


زفة العريس والعروس بالطريقة الفلسطينية

زفة العريس والعروس بالطريقة الفلسطينية أسم الله عليك يا عريس عليك اسم الله جبنا لك غزال محنى حنن يا قرع حنن شوف الحلوة بيجنن طولك

 
  29-01-2009 01:02   رقم المشاركة : 1
:: عضو ::
فتحاوي للموت
الصورة الرمزية فتحاوي للموت

تاريخ التسجيل : 11-01-2008
مكان الإقامة :
عدد المشاركات : 28

فتحاوي للموت غير متواجد حالياً
افتراضي زفة العريس والعروس بالطريقة الفلسطينية

زفة العريس والعروس بالطريقة الفلسطينية


أسم الله عليك

يا عريس عليك اسم الله جبنا لك غزال محنى

حنن يا قرع حنن شوف الحلوة بيجنن

طولك طول عرابي باشا شوفك خلا الناس دهاشا

يا محمد لا تهتم رجالك شرابين الدم

اعطيني توبك ترقص فيه وبنص الليل تعالي خذيه

يام الثوب سباغ الهندي ما بقيلك حاجة عندي

يام الثوب ال الطرزتيه حطيت البلاوي فيه

عن جويزك خبيتيه ولعشيقك فرجيتيه

يا محلا ضرب الشباري في الاعدا والدم جاري

ياويل اللي يعادينا يطلع برة يلاقينا

ياويل اللي نحاربو بالسيف نقطع شاربو

ياويل اللي يحاربنا لو وقفت شواربنا

محمد يا نور العين يازمردة في قلادة

ياريت امك جابت اتنين يوم الحبل والولادة

بابور على الجسر ممدود وخشبة من لديد النجارة

واحنا حزام المتاريس لو صار ع البيض غارة

يا صاحبي ناديلي نادي من فوق ابو عرف مايل

عن خويلفه للبساتين ما يسكنوها قبايل



زفة العروس

يا عينها عين الحور يا خدها كما الدوحان

يا شعرها كمالف الغمور وحدهن بالدهان

يابنت جملك نهشني واجت نهشتو في الملاية

ورمان صدرك دهشني وخلى فطورك عشاية

ياريت طيرنا موس واطير على جناحو

واهدي ع الخد وابوس واقول طابت جراحو



درج يا غزالة يارزق الحلال

درج يا حبيبي ريتك من نصيبي

تلولحي يا دالية يا ام غصون العالية

تلولحي عرضين وطول تلولحي لقدر اطول

يلعن أبو المدارس غلّن مهر العرايس

يلعن ابو الجامعات غلن مهر الطالبات

يام الثوب ال طرزتية حطيتي البلاوي فيه

وعن جويزك خبيتيه في نص الليل تعالي خذيه



الهيلمان الهيلمان


الهليمان على تمو تمو يا خاتم سليمان

الهيلمان على طولو طولو يا عود الريحان

الهيلمان على عيونو عيونو يا فتحة فنجان

الهيلمان على شعرو شعرو يا ريش النعام

الهيلمان على سنو سنو يا لولو ومرجان



يردد اللويح ويرد الشبان والعريس في الوسط

كنت أعزب داير مجنون

بلعب بين الشبّان

قاللي عقلي واتجوّز

قسمة نصيب أخذت الزين

حبل الزين وجاب غليم

وصار يقوللي يابابا

بدي حلاوة منفوشة

مديت ايدي ع الجيبة

لقيت الجيبة منكوشة

ومنو منو صار الغوش

وع السرايا ودوني

ألف عصاية ضربوني

ويا ثعلب ويا مكار

وايش دلّك ع باب الدار

دلني ما دلني

دلني ابن عمي النمس

اللي لفتو قنطار




يا بنت ياللي في البيت لا تحسبيني جنيت

يا بني ياللي في الدار لا تحسبيني غدار

لولا الحكومة والحكم قاسي

لانزل ع ابوكي بموس الكبّاسِ

لولا الحكومة والفدائية

لانزل ع ابوكي بموس وشبرية

يا رمان رمان مليسي يا رمان كلو على كيسي





زفة قرية بيت حانون
حمام العريس

في العادة يقوم أحد أصدقاء العريس بدعوته إلى بيته وتتم الحلاقة والحمام في بيت الصديق:

عطرلو شليشو هالعريس

غالي ع اهل حوشو هالعريس

واحلق يا حلاق وعطرلي شليشو

نيّال العريس الغالي ع اهل حوشو

عطرلي منديلوٍ هالعريس

غالي ع اهل جيلو هالعريس

عطرلي عقالو هالعريس

غالي على خوالو هالعريس

عطرلي محرمتو هالعريس

غالي على مرتو هالعريس



يخرج العريس من بيت صاحبه باتجاه بيت العروس

طالعين من باب هالدار لا بسين ملبسين

لا بسين الجوخ الاخضر على كتوف السلاطين

وابعدو العريس عن خيو من عيون الحاسدين

طالعين من باب هدار لابسات ملبسات

لابسين الجوخ الاخضر على كتوف البشوات

وابعدو العريس عن خيو من عيون الحاسدات

العريس وربعو راكبين مهارة العريس وربعو راكبين مهارة

زغرتيلو يامو يام اسوارة لخوف بنيك لتصيبو العين

يا مرحبا هذا بنية معاهم والخيل تلعبو على الصفين



ياسَمَك عظمك جرحني ياسمك وليش ما تنعم علينا ياملك

ياسمك عظمك جرحني باليمين ليش ما تنعم علينا يا وزير

ياسمك عظمك جرحني بالشمال ليش ما تنعم علينا يا سلطان

في سوق الجية يا عريس بيع امك في سوق الجية

رطلين هدية هات لي بحق امك رطلين هدية

في سوق الساحل ياعريس بيع امك في سوق الساحل

جوز المكاحل هاتلي بحق امك جوز المكاحل

وعقبال العزابية


التوقيع : فتحاوي للموت
من لم يكن فتحاوياً فاليبحث عن فلسطينيته

 
  29-01-2009 18:41   رقم المشاركة : 2
:: عضو ::
the boss
الصورة الرمزية the boss

تاريخ التسجيل : 15-08-2007
مكان الإقامة :
عدد المشاركات : 591

the boss غير متواجد حالياً
افتراضي رد: زفة العريس والعروس بالطريقة الفلسطينية

مشكور اخ فتحاوي للموت وعقبالك ان شاء الله انت وكل الشباب...

تحياتي


التوقيع : the boss

 
  19-04-2009 12:12   رقم المشاركة : 3
:: عضو ::
شوق
الصورة الرمزية شوق

تاريخ التسجيل : 15-03-2009
مكان الإقامة :
عدد المشاركات : 56

شوق غير متواجد حالياً
افتراضي رد: زفة العريس والعروس بالطريقة الفلسطينية

مافي احلى من زفاتنا....

جد بستغرب من اللي بيكون عندهم هالتراث الحلو...وبيروحو بيعملو زفه مصريه..او عراضة سوريه... او بيجيبو ..بالرينا لتعملهم show

عقبال عند العايزين..


التوقيع : شوق
"بنت " ..شيوخ ...وكلامي شموخ..
من شافني يدوخ..بنت عز ما انهز..
بنت ناس ما أنداس ..بنت امي..
وما حد يهمني..رافعة حاجبي..
وما حد عاجبني...انا بنت صـفـد..

 

أدوات الموضوع


المواضيع المتشابهه
الموضوع كاتب الموضوع المنتدى آخر مشاركة
الف مبروك المولود الجديد [ خالد العريض ] the boss منتدى مخيم البداوي 09-01-2010 18:06


الساعة الآن 01:22



Powered by vBulletin® Version 3.8.8
Copyright ©2000 - 2017, vBulletin Solutions, Inc.
جميع الحقوق محفوظة لمنتدى عبد خطار
Style & Design By : Baddawi.Com