سهرة فلسطينية في مخيم البداوي للعروس ناديا دهيدي
سهرة فلسطينية في مخيم البداوي للعروس ناديا دهيدي
محلا دبكتنا ومحلا غناها مش كل الخلايق تلعب دلعونا
سهرة فلسطينية في مخيم البداوي للعروس ناديا دهيدي
على نغمة سبل عيونه ويا زريف الطول والإيويها زفينا العروس
ايويها بحنة مكة جيت تحنيكي
ايويها يا بدر ضاوي والحلا كله فيكي
ايويها وما تلبق الحنة إلا لإيديكي
ايويها يا جفرا زينة العرايس لمحمد توديكي
من زمان كانت اعراسنا سبع ايام بليالهم …
وهالايام يا دوبك ليلة وبمشي الحال
بس احنا بدنا نرجع ايامنا كلها ….
وبدنا نغني زي ايام زمان
سبل عيونه ومد ايده يحنونه
غزال زغير وبالمنديل يحنونه
يا امي ويا امي حشيلي المخدات
وطلعت من الدار ما ودعت خياتي
بمخيم البداوي …. سهرة فلسطينية….
يا ريت الكل كان معنا
حنينا العروس…وجليناها…..
ايوها قومي معي يا نعنة
ايويها ويلي بالدهب مقمعة
ايويها ويخليلك ابوك واخواتك
ايويها وتضلي بحياتن مدلعة
يا نور يا نور يا نور عينيا
شمعة وبخور للشلبية
شمعة وبخور لبدر البدور
جبينا يشعش نور شمعات مضوية
حورية من الجنة بجمالها نتغنى
وعريس يستنى ونيرانه قوية
خبز صاج، وأكل كانت تطبخه ستي وستك
يعني اكل محرز مش متل هالايام
راح اترككم مع الصور
ملاحظة: السهرة تمت في بيت أطفال الصمود، بتاريخ 9 أيار 2009
لانه العروس من العاملات في المؤسسة ومن بناتها كمان
بس يا خسارة حتسافر على المانيا
الله يوفقها
يلا شباب وصبايا الكل يعمل عرسه فلسطيني مش اي شي تاني
عنجد ما في احلى من أعراسنا
محلا دبكتنا ومحلا غناها مش كل الخلايق تلعب دلعونا
ميسون مصطفى
