عا فِكرَه.. العرب بالبيجاما
عا فِكرَه.. بقلم روني ألفا:
عالم عربي بإمو وأبو لابس بيجامتو المألّمه وساردها عالصوفا وعميلعب كاندي كراش وعميتفرَّج عا مقابر الشُّهدا بفلسطين.
عالم عربي قَشِّه لَفِّه عميشرب فنجان إسبرسو وكابوشينو وعميتسحَّر بالمعكرون والكرابيج والكلّاج وقت الّلي أطفال فلسطين عميشربو دمًّن بفلسطين وعميتسحَّرو بأشلاءن.
عالم عربي ما قَطَم ولا مباراة من مباريات بطولة العالم بالفوتبول وشعَّل ربيع عربي لتحرير إحتكار بث المباريات من قطر، وقت الّلي فلسطين كلها صارت طابِه ملتهبه بملعب السُّكوت المخزي وشعَّلت ربيع عربي من بطولة محمد الدرَّة ومحمد خضَير.
عالم عربي دوكما عميحضر فلومِة سينما وقت اللي المسرحيه عمتلعب عا راس فلسطين وأبطال فلسطين عميموتو قبل ما تخلص المسرحيه.
القبِّه الحديديه اعترضت كم صاروخ قسّام وقت اللي ما حدا اعترض من العرب اللي عميقولو انو حماس طخَّنتها مع اسرائيل وعمتعمل من الحَبِّه قِبِّه.
إسرائيل عمتقوِّصنا بجبيننا وبأرضنا وبكرامتنا ونفطنا، ونحن جبيننا مَسح الأرض وأرضنا وكرامتنا بِعناها بالبترول لإسرائيل لتفوِّل مازوت باب أول بخزانات دباباتها.
ايَّ منبِّه بدّو يوعي العرب من نومهن وأحلامهن بالنسوان وساعات الرولكس والجاكوزي والتدليك بجزر هاواي؟
اسرائيل حلمت باغتصاب العرب وعمتحقق حلمها والعرب حِلمو ببعضن وقامو يغتصبو بعضن عا تويتر وعالفايسبوك.
إسرائيل عمتتوسَّع والعرب صارو شَعب مَشاع، وبحجة حماية أمنها رح توصل عالهلال الخصيب كلّو بوقت العرب مختلفين عا هلال رمضان؟
ما في اشطر مِنّا بحفظ الشِّعر وبألعاب السيف والترس ورفع جران الكبِّه والمحدله وما في أكسل منا بحفظ الكرامه واستعمال السيوف.
روني الفا | ليبانون ديبايت
