الى زياد اللبناني من زياد الفلسطيني
الأخبار- ضحى شمس
13-10-2014
هذه الرسالة الرد، وصلتني من الزميل زياد شتيوي، احد كتّاب صفحات “مخيمات”، تعليقا على مقالتي السابقة هنا “ايه زياد..فْلّ”. ولبلاغة بساطتها، انشرها هنا.
كيفك زياد. انا اسمي زياد كمان. يمكن انت ما بتعرفني ولا بعمرك شفتني ولا بحياتنا التقينا سوا. مع انو عمري من عمرك. انا السنه كمان، بطبق 59 سنة متلك. ويمكن حياتك احسن
كتير من حياتي وعيشتي. والفارق اكيد بيناتنا كبير من حيث التربية والعيشة..
بعرف هالشي. وبعرف كمان انو انت ما بتآمن بالفارق الطبقي، لانك انسان بكل معنى الكلمة. وبعرف إنك من مناصري الفقرا ضد الزعما, انا فلسطيني من مخيم وانت لبناني بيعشق الفقرا وبدافع عنهن, ومتبني فكر اشتراكي هيك على علمي.
انا يا زياد – طبعا بدون القاب لاني بعرفك ما بتحب الالقاب ولا الفلسفه الزايدة والكذب والنفاق- انا عرفتك من زمان وكنت اتابع مسرحياتك واذا مش ناسي شي، بعتقد اني بحفظ مسرحياتك عن ظهر قلب. بس للاسف ما كنت اقدر احضرها لانو ما كان معي سعر التذكرة، مع اني كنت احاول اجمع، بس ما كانت تزبط معي. كنت اشتري الكاسيت عشان اسمعك وصدقني كانت كل الكاسيتات الاوريجينال عندي, بس لما تدمٌر المخيم انحرق كل شي عندي, بس اسمع الك حلقة ع التلفزيون اعمل جهدي اني احضرها مهما كانت, حبيت اسلوبك الساخر من هالواقع الزفت ويمكن بقدر اقول اني بتفق معك بكتير من طرحك بالسياسة وبالفن وبكل شي. حتى بالمسبٌات ايه, انا متلك ناقم عالوضع ومتلك مش عاجبني شي بهالعالم الاهبل. خاصة بهالايام الوسخة الي اختلط فيها الحابل بالنابل. بس انا ضد انك تفل!
ايه ضد انك تفل وتهرب. معلش سامحني انا بسميها هريبة.
اذا فليت دخلك وين بدك تروح؟ فكرك انك رح تخلص؟ انت عم تكذب على حالك زياد. واللي مثلك ما بيفل. اللي متلك بيبقى وهنٌي اللي بيفلوا. ايه ايه هيك المنطق والعقل بقول. ولمين بدك تترك الفقرا والمعترين؟ للزعما؟ يمكن انا مش لبناني لأتدخل . يمكن حدا يطلع يقلي وله يا فلسطيني؟ انت شو دخلك!؟ ايه يمكن. يمكن يطلع شأن داخلي.. وانا عم اتدخل بالشأن الداخلي وتصير قصه وجرصة. بس انا بحكيك لأني بحسّ حالي من جماعتك. والله ما تستغرب كتير. انو معقول يعني؟ ايه ليش انت حكر على اللبنانية بس؟ ايه انت النا كمان! طالما انت للفقرا والفقرا ما الهن وطن ولا هوية. عشان هيك بحكي معك.
زياد الفقرا والمعترين بهالبلد بحاجتك اكتر من اي وقت. وبعدين يا اخي مش على ذوقك تفل! شو القصة هيك يعني؟ على خاطرك؟ لا حبيبي. مش مسموح. اعذرني. بعدين يا حبيبي شو تغيٌر؟ ما انت من سنين طويلة بتحكيلنا عن ابو الجواهر ولحم بعجين والخندق.
ايه زياد، هاي صرنا بنفس الخندق. متل زمان على ايام الحركة الوطنية. ايه.. شو يعني؟ وين بدك تفل؟ اذا انت فليت وغيرك فل واللي زيك بفلوا.. فهمني: مين رح يبقى؟ وليش انت حبيبي مفكر حالك لحالك؟ يعني اسمحلنا فيها انو انت ملك حالك؟
خليك زياد وما تفل.. مع احترامي لرأي ضحى.
هني لازم يفلوا وانت لازم تبقى.
