اخبار الوطن العربي

خاص – 15 نصيحة من شيخ سلفي في عيد الحبّ

“ليبانون ديبايت” – الشيخ السلفي بلال المواس

ما يسمى بعيد الحب، بالنسبة إلي غير موجود، ولا يعنيني بشيء من حيث المناسبة ، فهو أولا مش عيد ديني للمسلمين، وهو كذلك للمسيحين، حيث يعتقدون أن “فالنتين” كان يساعد الفقراء والمساكين، وعيده لا علاقة له بقصص العشق والهيام والحب والمودة.

ولكن فعلياً وعملياً هو موجود والكل يتناوله سواء كان موافق عليه أو معارض وبالحالتين هو عم يهتم به إما احتفالاً أو إنكاراً له .

لذلك أحببت أن أوجه في هذا اليوم عدة نصائح للفتيات وللفتيان:

1- لا تثقوا بأي شخص قلبه أبيض .. كل الناس قلوبها حمراء ..اشمعني هو قلبه أبيض؟ إيه؟ أكيد فيه شي علة أو مصيبة !

2- أوعكم تصدقوا أنو الغايب عذره معه ..لالالا ..أبسولوتلي ..الغايب يمكن يكون محبوبه معه وعم يخونكم فانتبهوا لهيدي النقطة وما تشغلولي القلب الطيب !!

3- اقرولي هالحوار زكاتكم:

-بتحبها؟

– إييييه .. والله بحبها كتير

– طيب روح احكي معها

– لاه .. أنا رح أحكيها أدام أبوها وأطلب إيدها منه

هاد الكائن انقرض ومات وشبع موت .. ونصيحة مني لا تنتظروه لأنه مش رح يجي بنوب بنوب

4- أوعكن حدا يقول لشريكه : بخاف تحب أو تحبي غيري … لأنه من كرم أخلاقه وشهامته لشريككم رح يحب غيركم حتى ما تبقوا خيفانين!!

5- لا تسمحوا لشريككم أنو يتدخل بأكلكم .. أوعى حدا يقلكم لا تاكلوا كتير، أنا بحب أبو أو أم ولادي يكونوا نحيفين .. وإذا مش ولا بد وحدا قلكم هيك شي ..قولوله إيه ونحن شو دخلنا بأولادك المستقبليين؟؟ وصدقوني بهالحالةبيطلعلكم رغيف هدية

6- نصيحة لكل واحد .. مش كل مين حدا صفن ونظر بوجوهكم يكون معجب ..إحتمال يكون متعجب هاه !

7- أنتبهوا منيح من أي حوار شبيه بهاد، لأنه آخره بيوجع كتير:

هو: أنتِ لفتي انتباهي

هي: ما فهمت !!

هو: يعني انا انعجبت فيك

هي: ما فهمت !!

هو: يعني انا بحبك

هي:يعني رح تجي تخطبني؟؟؟؟؟

هو: ما فهمت !!!!

8- عزيزي الشاب ..إذا بتحبها عن جد .. لا تكتب إسمها على قلبك .. اكتب قلبك بإسمها .. أو اكتبلها السيارة حتى تضل متعلقة فيك.. وصدقني هالطريقةمضمونة !!

9- عزيزتي البنت، أوعك تغلطي شي مرة وتقولي لحبيبك “كل الشباب خاينين” أو ما شابه .. أحسن ما يقللك وأنت مين قلك جربيهن كلهن !!

10- عزيزي الشاب لا تضربها كف وتقلها بحبك .. وجع دموعها رح يكون أقوى !!

11- عزيزتي البنت ..كسر قلبك؟؟ اكسريله زجاج سيارته .. وخصوصي الأمامي .. هاد بيجي غالي كتير .. بدل ما تنزلي بوست عالفايس

12- إذا رفيقك أو رفيقتك بالجامعة سألوك عن قلم أزرق زيادة .. فثق تماماً أنو الخطة انرسمت عليك وجاري تطبيقها وتطبيقك

13- احفظوا أسامي اللي بدك تحكوا معه أو تراسلوه أو تتصلوا فيه .. أحسن ما تعلقوا بهيك حوار:

هي:بتحبني؟؟

هو:بحبك وبموت فيك يا سوسو

هي:مين سوسو ولا فادي؟؟ أنا ميمي

هو:مين فادي ؟؟ أنا سامر !!

14- أعزائي .. إذا شريكم قال لكم “سنفترق” ..قولوله أوكيه ما في مشكل .. وإذا سألكم يعني مش فارقة معكم؟؟ قولوله لحظة بدي نزّلك دمعتين .. خطي !!

15- النصيحة الأخيرة للشباب: مش عيب عفكرة أنك تتسلى معهاولا عيب كمان أنك تحكي معها ومع غيرهاولا عيب أنك تقول لل2 نفس الكلامومش عيب أنك تراهن مع رفقاتك إذا فيك تجيب رقم تلفونهاومش عيب أنك مخصص واحدة لكل تطبيق..هاد كله مش عيب … العيب أنك تكون لسا مقتنع بحالك أنك “زلمة” !!

وختاماً، اللي حب منكم .. يحب ويلزق .. وأوعى ثم أوعى ثم أوعى .. يعيد الحب … لأنه الحب ما بينعاد !!

بلال المواس | ليبانون ديبايت

2015 – شباط – 14

مقالات ذات صلة