عافكرة.. غَزِّتنا… وعِزِّتنا
عافكرة.. غَزِّتنا… وعِزِّتنا
عا فِكرَه… بِقَلَم روني ألفا:
غَزَّة يا حبيبِة قَلب العَرَب، العَرَب اللي صار قَلبُن عا أكل الكافيار والمنسف، العَرَب اللي نِسيوكِ، العَرَب اللي عَميقاومو معكِ رَفِع عَتَب بِكَم بيان مجَعلَك بينشرولُن ياه بِكَعب صفحِة الوفيّات بالجَرايِد.
إنتِ بعدِك عايشِه عا أمَل إنّو يوعى شي زَعيم عَرَبي من النّوم، ويقرِّر ما يتابع بورصِة نيو يورك كل يوم عا بكرا، وما يِهتَمّ قدّيش ثَروتو زادِت بين قبل الضّهر وبَعد الضّهر. ناطِرا هالزّعيم اللي ما رَح يِجي.
أمِّتنا مبنّجِه وسلاحها خِرضَه، وكلّ اللي بِقي دَعوِة مَجلِس الأمن للإنعِقاد ،هالدّعوِه اللّي بتذَكّرني بالمَتل الشّعبي:”جِبنا الأقرَع ليَونِّسنا كشَّف عَن قَرِعتو وخَوَّفنا”،السيوف صرنا عمنستعملها لنقطّع رقاب بعضنا،يا خجلتنا من صلاح الدين الأيوبي وخالد بن الوليد ومن تاريخ البطولات اللي عَلّمناه لَولادنا!
الصهاينِه خَطَفو محمَّد أبو خضير إبن الأربعتَعشَر سِنِه وجَبَروه يِشرَب بِنزين وولّعوه وتفَرَّجو عليه ونِحنَ عَمنولِّع المساجِد والحسينيات والكَنايس بالبِنزين وعَمنولِّعُن.
أنا مِن وَطَن القبايِل والغَزوات، وطَن لازم يستحي بِأَعلامو،وطَن مَنهوب ومَتروك جِلدِه على عَضمِه.
ما في جَزمَه ما دَعوَسِتنا ومِلهيين شيعَه وسنَّه،وإذا كان الحجاب مَسموح بالمَدرَسِه أو ممنوع، وإذا مِنصَلِّب بالتلاتِه أو بالخَمسِه، بالوَقت اللّي إسرائيل فلتانِه عا حَلّ شَعرا تقتِّل ولادنا ونِساءنا وكبارنا.
مِش صَحيح إنو غَزَّه بعيدِه،ومِش صَحيح نخلّيها تقلِّع شَوكها يإيدها لأنو كِل صاروخ بينزَل عليها بيعني إنو قَريباً رَح يِنزَل علينا ببيروت والشام وبغداد وعمّان والقاهِرَة والرياض.
وَين ملوك العَرَب ؟ وَين الرّؤسا؟ ولَك التّركي كان عِندو كَرامِه أكتَر منّا وأخَّر تِطبيع العلاقَه مَع العَدوّ ليوقِّف عِدوانو!
الأَكراد بلَّشو يَعطو الصهاينِه بترول ليضَلّو الصهاينِه يشَرّبوه لَولادنا ويحِرقوهن هِنّي وطَيّبين، الصهاينِه عَميحِرقونا ونِحنا عَمنفَتِّش إذا التّلجات بسويسرا مفَوخرين أو مناح للتزلُّج.
زعماءنا عَميكَدّسو ثَروات طائِلِه بالبنوكِه السويسريِّه بالوَقت اللي غَزَّه عَمتنمَحى عَن بِكرِة أبيها.
يا خَليفَه البَغدادي بَدَّك تدَبِّحنا فِهمنا،بَسّ وزِّع سكاكينَك شوي عا رقابنا وشويّ عا رقاب الجَيش الإسرائيلي!
غَزَّه! أنا ما عِندي إلا الدّعاء والصّلا،متلي متل كتار من هالمَحبوسين بالعالَم العَرَبي وشاعرين بالإهانِه والذِلّ وناطرين صلاح الدين الأيوبي أو خالِد بن الوَليد يشَرِّفنا عَن جديد ونقِلّو إلنا الشّرَف!
ليبانون ديبايت
